गाथा अभंग २७७
आणिकांची स्तुति आम्हां ब्रम्हहत्या । एका वांचूनि त्या पांडुरंगा ॥१॥
आम्हां विष्णुदासां एकविध भाव । न म्हणों या देव आणिकांसि ॥ध्रु.॥
शतखंड माझी होईल रसना । जरी या वचना पालटेन ॥२॥
तुका म्हणे मज आणिका संकल्पें । अवघीं च पापें घडतील ॥३॥
अर्थ :- आम्ही एका पांडुरंगाशिवाय इतरांची भक्ति केलि तर ब्रह्महत्येचे पातक लागेल ।।1।।
आम्ही विष्णुदास पांडुरंगाचे एकनिष्ठ भक्त आहोत, म्हणून अन्य देवतांना मानत नाही ।।ध्रु।।
या वचनामध्ये मी जर खोट बोललो असेल तर माझ्या जिभेचे शंभर तुकडे होतील ।।2।।
तुकोबा म्हणतात, एका पांडुरंगाशिवाय इतर संकल्प माझ्या मनात प्रवेश करतील तर जगातील सर्व पापे मला लागतील ।।3।।
कोणत्याही टिप्पण्या नाहीत:
टिप्पणी पोस्ट करा